as ek vir jou kon geluk wens
skep ek vir jou bruisende borrelende bergwater
vanuit die hooglande van uKhahlamba
sade van bont blommetjies bring ek vir jou
om te plant in jou tuin duskant Woepertal
en hoog in die berge by ‘n ou sendingstasie
koop ek vir jou ‘n Sederhout-juwelekissie
op Orochovley lê nog steeds ‘n Karakoelvelletjie
van ‘n lammetjie wat ek help vang het
sag en weerloos gewieg het op die Landrover
ná dertig jaar skenk ek die velletjie
gespalk deur Langman die Wambo
vir jou
en uit daai stoorkamer met reuke van bloed en diere geskiet
klim ek op die groot tafel en hak vir jou oom Foekoe
se beste beesbiltong af
ruik dit proe dit smul dit op
môre gaan ek nie saam op die jag vir ‘n Gemsbok nie
bly ek tuis by tant Jet in die kombuis
en hou later vir pa dop waar hy skilder teen die muur van die skuur
hoe Langman die Wambo die velletjies spalk
van die lammetjies van die kraal wat ons
op snerpende Julie-wintersoggende sou gaan haal
die lammetjies van Orochovley, Okombuka en Elsieskraal
my mooiste herinneringe skenk ek vir jou
as ek vir jou kon geluk
wens
🦋
© Annora Eksteen, 2006
Lourmarin-woonstelletjie, 2013
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.