by die see het sy in prismakristal
die son sien opkom en geweet
alles was nie verniet nie
die kleure het in skerp sproeivloei
haar wese gevoed
in lasuursteen was die dag aan die kom
karmosyn kontoer haar bloedlyn
in die geel oranje son se soen
in die ligblou in die blanje
in die blink diamant se lemoen
en in die asuur en oker van die agaat se lig
het sy op die saffraansand gaan sit
deurskynend agteroor gaan lê
en haar oggend
bedig
© Annora Eksteen, 2009
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.