net ‘n rukkie se chemoterapie
al is die kanker in my destyds weg, onthou ek
die vrees vir metastase, vir terminale lyding
en in hierdie land, hoekom ons nog nie
die keuse van Dignitas kon kry nie
terug na chemo-behandeling destyds in 2004
hierdie middels wat selverdeling afskakel
die behandeling van siekte
deur die gebruik van chemiese stowwe
veral die behandeling van kanker
deur sitotoksiese en ander middels
wat selle beskadig of vernietig
want die gevaarlikste is dat die kanker kan versprei
daarom moet die hele liggaam behandel word
in sistematiese terapie waarvan hormoon- of endokrieneterapie
‘n deel is van en nodig is vir hormoon-sensitiewe gewasse
endokriene afgelei van die Griekse terme endo
wat binne beteken, en kriene, wat beteken om af te skei
afskeidingsprodukte van endokriene kliere is hormone
en word direk in die bloed deur die liggaam gedra
waar hulle slegs selle beïnvloed wat reseptorplekke
vir daardie hormoon het
adjuvante of bykomende terapie beteken
die behandeling met chemikalieë is toegedien
nadat die kanker uit die bors en oksel se kliere verwyder is
die middels wat meestal in gevalle soos myne gebruik word
is antrasikliene, bekend as die rooi duiwel, en taksane
en nou, met soveel informasie ingeneem
haal ek darem meer weerbaar asem
in my weefsels se wondletsels
so dankie Liefentjiefontein
dankie Besitwater en Matjiesgoedkloof
dankie Stofputs van Droëgrond in die land van ǀXam
dankie pagoed in jou kisgoed vir jou diggoed
ek het julle eergister beloof
ek sal nou ophou kla
ophou net
wil doodgaan
🦋
© Annora Eksteen, 2025
.jpg)
.jpg)
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.