vertel vir my julle verhale
hier waar ek langs die ou rivier hurk
julle sing julle kom van die plek van rookwater
van die bron van die Tshwelarivier
julle sing julle kom van die ou berge
waar die edelvalke hulle neste skrop
met julle kaalvoete fyn
julle lywe wat in die maanlig skyn
het julle baardaasvoëls agter bergspitse
sien verdwyn
met julle klere van blare en lang modderhare
het julle in die mis van Maletsunyane
op wilde ponies gery
daar het julle met julle bokke rondgewei
en vir hulle julle stories vertellend voorberei
daar het julle 'n heuwelhut gebou
om vir klein Buksie by julle veilig te hou
tussen heide en huls
tussen veldgras en wilde vullens
kon hy gesond word en speel
met modder mors soos ‘n kind weer
en smiddae laat as bont soos ‘n reënboog
‘n sonsondergang oor julle groen bergland hang
het julle vir hom ou stories vertel in sang
in my riethut snags
sal ek julle weses leer verstaan
en deur die spoelwaterliedere
my diep dors les
ek — riviervrou digteres
oor julle brose naaktheid
sal ek my rivierarms slaan
tot waar ons reisend
oor die plek van groot lawaai gaan
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.