sy vra
vat my saam
na daar waar jy so baie gaan
so my engel, kom
ek vat jou vanaand
na ‘n klassieke musiekaand
volmaakte komposisies
temas variasies
uiteensettings, ontwikkelings
en herhalende slotakkoorde
‘n opgevoede gehoor
‘n asem wat intrek
‘n Haydn tjellosnaar
sy vra vir my, die stil een
is dit Mozart wat ek hoor
jy weet my dier
Debussy klink wasiger
op die oor
‘n meisie in ‘n rok van donkerrooi satyn
haar vingers dans en dartel
soos feë in Monet se tuin
sy sê
vat my weer
ek wil meer leer
wat jou so inspireer
my engel wee jy
dit was ‘n leeftyd vir my
die stadsale, ouditoriums
orkesputte en verhoë
van ou teaters van hier
en ook die waters oor
ek drink dit in met my tee in die oggend
ek gaan slaap met musiek in my sjerrie
ek haal asem soos frases kunsmusiek
want, jy weet
party speel net note
ander maak musiek
party tref my
in my diepste wese
ander tref my
nie
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.