in hierdie tussenpose
hang jy my op aan die wasgoeddraad
onderstebo aan my tone hang ek
en spin jy die wasgoeddraad
jy druk vir my ’n pen in die hand
take notes sê jy en loop verby
die skuifhek uit die strate in
baie ander loop eenvoudig
al geselsend
verby
en ek swaai en draai kop onderstebo
tot die wasgoeddraad stil raak
en ek steeds onderstebo hang
dit raak donker
ek is in die lugleegte
ek werp my in
daar is
geen gedagtes
geen poësie
net mense wat my aanstaar
dan hulle koppe wegdraai
as ek opkyk my oplig
my arms uitstrek
my hande oopvou
die draad vasgryp
my bene uitskop
en soos ’n mal vrou op ’n perdedans
ou Franse plattelandse musiek
al om die Maypole vlieg
🦋
© Annora Eksteen, 2010
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.