so kap nou lekker die rooi stuk vleis
gooi dan geel borrie op die rys
ming die kropslaai met asyn
en skink weerie perskiewyn
want waar is tameletjie
en waar die perskie-oes
o nee, o nee, ta’ Lettie
bring bitter pampelmoes
o waar is Diena nou
en waar dan klein Magriet
en waar die bonnels duiwe
die vinke innie riet
plukkie perskies, die boom dra swaar vanjaar
pak weer ‘n kissie vol vir Daan
dra vir Beenbreek en vir Sara aan
en droogie anner weg
gooi die blink jukskei net by die pen verby
trekkie tou en vir Pietman oorie streep
skiet papgaatjie in sy bebliksemde keep
aai waar is misvloerdans
en waar konstienatrek
o nee, o nee, lang Sareltjie
lê witbeen by die hek
maar op allie boorde
pakkie luise dan nou wit
die perskies ennie pruime
het bitter by die pit
ennie plaaspad, o die plaaspad
lê maanhaar donkergat
lê maanhaar donkergat
tot duskant borrelsat
🦋
© Annora Eksteen, 2025
PERSKIES is ‘n verwerking van gedigte uit die digbundels ‘N FLUIT IN DIE RIET, Nasionale Boekhandel, 1963 en VERSE VAN ‘N LANDLOPER, Voortrekkerpers, 1969 asook SKUILHOEK, Perskor, 1982 deur Louis Eksteen (1930–2001).
© Eksteen-gesin
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.