die aand toe ons op Driefontein dans
toe was ons o so jolig
Petrus op sy baskitaar
ou Goudkop op sy vedel
ja, dit was die outyd nog
met musieke uitgesoek
Niklaas op sy banjo’tjie
Jan Skeeftrap op die ô-rel
ja, dit was die vroeë tyd
toe ant Malie nog vetkoek kom voorsit
met boeretroos swart gegooi
uit haar ou voortrekkerketeltjie
tot oom Sarel Bokkies vir myn en dyn
mampoer ’n bekervol nou intap
van Boskop se rokende en hellerwit
perskiebrannewyn
dan mos
deurdruk dagbreek toe
dan mos allie pad
bálke toe
ja, het ons nie op Driefontein gedans nie
ai, ons was toe o, so jolig
maar toe’t die jongklomp anners beginne trap
die bop die swing die twist die jazzbrildraers
het platgevee met hale op ’n trom
die ritmeseksie met simbale
van die nuwe popse craze
rock en roll en toe net rock
en slaan wragtag daai trom
neuk goed daai staalkitaar
en praatsing mompelend van beibê
die enigste een
vir my
skreesing bedwelm die nag vaarwel uit koebaai
wie sou toe dan nou ooit kon weet
dat die donkerte sou kom
die donkerte, die vaalte
so ook met die plaas
al sy bewoners al sy gaste
in die daggazôl versuf
die staalkitaar verroes
met hierie wêreld wat ai
so psigedelies was
ai man!
maar maanligaande speel nog plaasmusieke
gedenkend aan die tyd verby
toe ons ai, tog te jolig was
en Driefontein uitgedans het
🦋
© Annora Eksteen, 2025
PLAASDANS is ‘n verwerking van gedigte uit die digbundels ‘N FLUIT IN DIE RIET, Nasionale Boekhandel, 1963 en VERSE VAN ‘N LANDLOPER, Voortrekkerpers, 1969 asook SKUILHOEK, Perskor, 1982 deur Louis Eksteen (1930–2001).
© Eksteen-gesin
Geen opmerkings nie:
Plaas 'n opmerking
Let wel: Slegs 'n lid van hierdie blog mag 'n opmerking plaas.